Santiago, 31 de decembro de 2009. O portavoz de Educación do PSdeG Guillermo Meijón, cualificou de “despropósito” o borrador do Decreto do Galego presentado por Feijóo e dixo que “busca trasladar ás aulas galegas o conflito da lingua xerado polo presidente da Xunta”. Criticou a “estratexia de nocturnidade, premeditación, alevosía e opacidade de presentar este borrador de Decreto nas festas de Fin de Ano e en plenas vacacións da comunidade educativa”.

 

Meijón sinala que esta norma foi “elaborada “de costas á sociedade galega e, nomeadamente, da comunidade educativa” e “por persoas que poucas ou ningunha vez pisaron as aulas” o que, sinala, “non invita precisamente a albergar grandes esperanzas de cara ao consenso lingüístico”. 

 

O parlamentario socialista apunta que o texto presentado “reflicte nidiamente a existencia de moi diferentes posicionamentos dentro do Partido Popular”, o que “ten provocado que o propio Presidente Alberto Núñez Feijóo prefira levar o debate e o conflito lingüístico a cada aula e centro de Galicia, antes de afrontar as grandes liortas que ocasionaría unha toma de posición clara por parte do Conselleiro de Educación”.

 

 

O responsable socialista sinala que o novo texto normativo “elimina dun plumazo a discriminación positiva a favor da lingua galega, que ten precisamente como obxectivo garantir a competencia do alumnado en galego e castelán”. Sinala así que o máis relevante é unha drástica redución de horas en lingua galega, “que pasan a ter, no mellor dos casos, unha mínima garantía dun terzo do horario, mentres o castelán podería abarcar o resto das horas salvo a materia de lingua estranxeira”. 

 

Dixo que a posibilidade de elixir a lingua por parte das familias periodicamente apunta “serias dúbidas funcionais sobre a súa aplicación real”, xa que o plantexamento apuntado polo Executivo “mesmo condenaría a moitas destas familias a resultar privadas do exercicio deste “suposto dereito”.

 

 

Meijón alude ademais ao Informe do Consello da Cultura Galega, que advirte de que "en ningún caso se deben tomar medidas que supoñan pasos atrás no proceso de recuperación do galego" e que a nosa lingua “precisa dun apoio especial para superar a súa posición actual de desvantaxe”. 

 

Sinalou que o PSdeG-PSOE e o Grupo Parlamentario Socialista sempre estarán a prol do consenso e da concordia, e reclamou coñecer as “verdadeiras intencións” do actual goberno, polo que reclamou a Feijóo e ao PP que, de ser certa a chamada a o consenso, apoien a moción presentada polos socialistas no Parlamento neste sentido. 

 

Nesta iniciativa socialista faise referencia á proposta do Consello de Cultura Galega de crear unha Comisión Parlamentaria na que as tres forzas políticas, xunto cos axentes sociais e a comunidade educativa poidan debater serenamente sobre o desenvolvemento do Plan Xeral de Normalización, nomeadamente no eido educativo.