Santiago de Compostela, 15 de xullo de 2009.- O PSdeG-PSOE acusou hoxe ao presidente da Xunta, Alberto Núñez Feijoo, de “mirar cara outro lado” ante o problema que está a sufrir o sector lácteo en Galicia.  O secretario de organización do PSdeG, Pablo García, pediulle “que deixe de tirar a pelota ao Goberno central e poña xa medidas sobre a mesa”. e instou ao presidente do Goberno autonómico e ao conselleiro de Medio Rural a que “se poñan  a traballar de inmediato” para resolver un dos problemas máis graves que está a sufrir o sector leiteiro nos últimos anos.

O secretario de organización do PSdeG pediu expresamente a Feijoo “que non faga só de observador e que aporte solucións”  e  “que apoie aos gandeiros con axudas económicas directas, ao igual que están a facer outras comunidades autónomas”.

García sinalou  que  Feijoo “limítase a recoñecer  o problema e dar a razón aos gandeiros, pero non lles aporta solucións” mentres que o conselleiro de Medio Rural “está completamente desaparecido”. O secretario de organización pídelles a ambos que “deixen de exercer o escapismo e se poñan a traballar”.

Pablo García afirmou que o Goberno de Feijoo “non fai nada máis que lamentarse e botar balóns fóra”. “Mentres o Goberno central está traballando, a Xunta segue paralizada”, sinalou,  recordando que “ mentres que o Ministerio de Medio Ambiente, Medio Rural e Mariño está  mantendo reunións con produtores e distribuidores para atopar solucións ao problema,  o Goberno de Feijoo non está facendo nada”.

Por elo, García demandou a Feijoo que “abandone a demagoxia e o escapismo, e se poña dunha vez a gobernar, que é o seu traballo”, e que aporte solucións inmediatas aos gandeiros.

O PSdeG esíxelle á Xunta  que tome exemplo doutras comunidades autónomas e estableza axudas directas ao sector dun máximo de 7.500  euros por explotación, que é o permitido pola Unión Europea. O partido socialista reiterou ademais o seu apoio ás reivindicacións dos gandeiro se as súas manifestacións, aínda  que condenando as actitudes violentas, como as que se produciron no día de hoxe.