Pontevedra, 24 de abril de 2009.- O novo Secretario Xeral do PSdeG, Manuel Vázquez Fernández, afirmou esta tarde que “abriremos as portas do Partido Socialista a todos os cidadáns” e manifestou o seu “inmenso agradecemento só comparable á ilusión que teño para empezar a traballar e ó compromiso co que vamos ser capaces de reforzar, cambiar, potenciar este partido, co único obxectivo de transformar este país”.

A súa candidatura foi apoiada polo 90´55% dos votos dos delegados, despois de presentar un proxecto para o PSdeG que é, segundo dixo, “a única alternativa de goberno para transformar este país”.

Nas súas intervencións no Congreso Extraordinario que o PSdeG está celebrando en Pontevedra incidiu en que “empeza unha época nova, nin mellor nin peor, distinta, pero da que co voso apoio e o de quen representades ten que saír un novo proxecto de país, para Galicia, para a nosa terra, e imos ser capaces de ilusionar a miles de Galegos e de galegas”, dixo Vázquez.

“Non se lle pode ter medo ó futuro; o futuro deste país o vamos construír nós”, aseverou, polo que prometeu para os próximos anos “vivir con pasión uha tarefa tan bonita e apasionante que é vivir con vós” e estar cerca de todas as agrupacións, das grandes e das pequenas.

"Vou facer política con maiúsculas, para a xente anónima, para a xente que necesita de nós, para os que esperan que fagamos o que lles prometemos”, asegurou Pachi Vázquez no seu discurso ante o Plenario do Congreso. Pero engadiu que “este desafío non o fai un home só, senón que ter que ser unha decisión colexiada”, polo que  “hai que debater e falar” dentro do partido; “o camiño está moi claro, e é ser responsables para que non haxa un só militante deste partido que quede fóra deste proxecto”, agregou.

Ademais Vázquez asegurou que “neste proxecto cabemos todos”,  e que todos o militantes deste partido están chamados a participar activamente. Ademais explicou que a súa máxima será “un home/unha muller: un cargo”, polo que a nova Executiva que presentará mañá ó mesmo Plenario ten que ter tempo para traballar, igual que el vai dedicar todo o seu “tempo empeño e ilusión” a esta nova estapa que comeza o PSdeG.

 
Non faltou por parte do novo líder dos socialistas galegos o agradecemento ó seu antecesor Emilio Pérez Touriño, polo seu traballo dirixido sempre a “sumar, unir e conseguir gobernar este país”. Tamén agradeceu a Jaime Barreiro a asunción do reto de dirixir a nova Escola de Dirixentes Socialistas que a nova directiva creará.