Santiago, 17 de abril de 2009.- O dirixente socialista Manuel Vázquez presentou hoxe ante os medios de comunicación o proxecto que levará ó Congreso Extraordinario dos próximos días 24 e 25 abril, “días claves para o PSdeG e para Galicia”.
Despois de reunirse con máis de 140 agrupacións locais das 32 comacas galegas e cunha representación das bases que prestaron o seu apoio na propia rolda de prensa ás que lle agradeceu o seu compromiso, Vázquez anunciou que ten “as ganas, a ilusión e a forza” para encabezar un proxecto de “profunda renovación de toda a estrutura do PSdeG”.
Un dos principios que rexerán esta renovación, segundo avanzou Vázquez, será a regra “unha muller/un home-un cargo”, e a filosofía que se seguirá pode resumirse nunha soa palabra: a participación. “A nosa militancia ten sede de participación, de que a escoiten”, afirmou.
Deste xeito explicou que na súa proposta se habilitarán canles de participación para que todos os militantes sexan parte activa do modelo, ó que engadiu a súa vontade de “abrir portas, ensanchar a base orgánica, e sobre todo participar en todas as estruturas sociais de Galicia”.
“O gran cambio ten que nacer de abaixo a arriba, desde cada agrupación, abrindo as portas sobre todo nas políticas de proximidade de cada un de nós”, dixo.
Explicou ademais que os cerca de 15.000 militantes que forman o PSdeG falarán no Congreso “con franqueza, asumindo o positivo e recoñecendo os erros”, pero especialmente coa vontade de ser a alternativa de goberno xa que “o PSdeG é a única alternativa de goberno seria e rigurosa deste país”.
Con respecto á Executiva que presentará dixo que ”ten que ter tempo para traballar, ninguén pode estar en dous ou tres sitios á vez”, e ter tempo implica “a vocación de ser o motor político do socialismo galego, de reunirse cada luns e tomar decisións, ter unidade de acción”.
Unha das súas propostas estrela será a creación en Galicia dunha Escola de Dirixentes do PSdeG, e dentro da Executiva “as áreas de formación e de novas tecnoloxías serán claves”.
Vázquez afirmou ter a sensación, despois de escoitar á militancia, de que moitos comparten estas ideas, polo que dá este paso e toma a decisión que está tomando, que é “poñer enriba da mesa esta alternativa”; algo que fai con ilusión. “Agora serán os compañeiros os que apoien o proxecto ou non, sen dramas”, agregou.
Con respecto ás persoas que teñan un punto de vista diferente, amosou a súa vontade de “diálogo e integración”, xa que está disposto a recibir ideas e propostas.
Debate de Investidura
Preguntado polos xornalistas, Vázquez valorou o debate de investidura, do que ao seu xuízo se constata que “o PP non gañou as eleccións, perdémolas nós”.
O conselleiro en funcións de Medio Ambiente afirmou que o discurso de Leiceaga foi impresionante, mentres que do de Feijoo, despois de presentarlle o seu respecto por ser o novo Presidente de todos os galegos, dixo que foi un discurso “de cortesía”, sen medidas concretas, e o contrario de todo o que dixera ata o 1 de marzo cando todo era culpa de Touriño.
Como cidadán, Vázquez cre que a intervención de Feijoo pódese resumir esencialmente en “estamos moi mal, nos imos poñer peor, e hai bastante pouco que facer”. Pero avisou de que “os cidadáns galegos non entenderían que dende a toma de posesión non haxa actividade intensa por parte do Goberno e da oposición”.
Chegada do AVE
Con respecto ó AVE, afirmou que José Blanco, Ministro de Fomento, “é a mellor garantía das de verdade de que Galicia ten un horizonte de futuro optimizado”, e a chegada do AVE será canto antes, “se pode ser hoxe non vai ser mañá”.
